الله بيدوّر على قلب يطيعه… مش على واحد بيعرف يكسبها بطريقته.

قصة شاول بتكشف لنا درس عميق جدًا عن الصبر والطاعة لوصية الرب.

بعد سنتين من ملكه، لقى نفسه في مواجهة جيش فلسطيني ضخم، عدده “مثل رمل البحر”، مسلحين ومجهزين بكل الإمكانيات.

شعب إسرائيل اتملكهم الرعب… بدأوا يهربوا واحد ورا التاني، ويستخبّوا في المغارات وبين الصخور.

حتى شاول نفسه حس إن جيشه بيتفكك قدامه.

كان متفق مع صموئيل إنهم يستنوا سبعة أيام لغاية ما ييجي ويقدّم الذبائح قبل الحرب.

لكن لما الأيام عدّت وصموئيل اتأخر، شاول ابتدى يسمع صوت الضغط:

الناس بتهرب… العدو بيقوى… والوقت بيجري…

فقرر يعمل اللي ماينفعش يعمله…

قدّم الذبائح والمحرقات بنفسه.

لكن ده كان خطأ قاتل، لأنه تعدّى على دور الكاهن، وكسر وصية الرب.

ولما وصل صموئيل، وشاف اللي حصل، وواجه شاول بكلمات صعبة:

“لقد تصرفت بحماقة، ولم تحفظ وصية الرب.”

وعلشان عصيانه وعدم طاعته، الرب أعلن رفضه لشاول كملك…

واختار بدلًا منه إنسان بحسب قلبه — داود.

صموئيل الأول (13 : 13 – 14)