"هل حياتك متأسسة بجد على الله… ولا مجرد شكل من برّه؟"

الكلام ده عميق جدًا وواقعي…

يسوع قال:

"ليه بتقولوا لي: يا رب، يا رب، وأنتم مش بتعملوا اللي بقولكم عليه؟"

تحذير واضح إن الإيمان مش مجرد كلام… لكنه حياة تُعاش، وأفعال تثبت الكلام.

يسوع شبّه اللي بيسمع كلامه ويعيشه بإنسان حكيم…

راح حفر في الأرض بعمق، وثبّت أساس البيت على الصخر.

ولما جت العواصف والأمطار والسيول… البيت ما وقعش، لأنه كان مبني صح.

أما اللي بيسمع ومش بيعمل…

فهو زي واحد تسرّع وبنى على الرمل.

البيت شكله حلو من برّه، لكن أول ما جت عاصفة بسيطة… انهار تمامًا، لأنه بلا أساس.

الموضوع ده بيلمس حياتنا جدًا…

في ناس جذورهم عميقة في الله، علاقتهم قوية… فلما تيجي أزمة أو تجربة يتأثروا شوية، لكن يفضلوا ثابتين.

وفي ناس علاقتهم سطحية، مجرد كلام أو شكليات… وأول ما تيجي مشكلة، يتكسروا بسرعة، لأن أساسهم ضعيف.

الخوف الحقيقي إننا نكون زي البيوت الهشة…

عشان كده مهم نحفر بعمق في علاقتنا مع الله، نخليها حقيقية، راسخة، ومبنية على الصخر.

لوقا ( 6 : 46 – 49 )